administrasión f.

מינהלה, מינהל, ניהול, הנהלה

la administrasion sinagogal i su prezidente / a los senyores maftirim es muy rekonosiente (manus. Vitali Varon, Const. 1948)

El Konsul Djeneral sera Sr. Abraham Goldberg, serkretario de administrasion de la Adjensia Ju­dia en Paris. (La boz de Turkiye, 1948)

La administrasion del opital no esta demandando ni un shekel de los Palestinianos, kuando salen del opital. Imajinavos ke karar de karo es el tratamiento de kanser en un opital komo Hadash! (Shalom, 2007)

dichozamente algunos miembros de la administrasion komunal tomaron a korason este dezmazalamiento delas eskolas i bushkaron a azer reformas (El Djugeton, 1922)

si el ke depozito las paras non kere ainda retirarlas, la administrasion [...] merkan por su kuento i sin gastes una ovligasion de segunda rendida (La Epoka, Sal. 1875)

se espera ke los esfuersos konjugados de las administrasiones eskolarias i del konsilio komunal arrivaran a las eskuelas a permeter a azer fases a sus gastes (La Boz de Turkiye, 1947)

esta divizada en tres grupos: la mayoridad es de akordo kon la aktitud de la administrasion palestiniana (La Boz de Turkiye, 1947)

perseverando en sus esfuersos de asigurar a las populasiones de su imperio el bienestar moral i material su maestad el sultan ordeno este anyo la aplikasion de nuevas i importantes reformas en la administrasion del pais i ke no tardaran a dar rezultados muy salutarios (El Tiempo, Const. 1896)