persona f.

בן אדם, איש

es mi persona

הוא עובד בשבילי

personas eskojidas

אנשים נבחרים

presona

380640

La persona asemeja a la mayimona

Lo kel Dio azi, la persona no lo dizazi

Persona ke aze gran mal, se topa en muy negro hal (T.)

La persona en pleito se konose

El selo i el dezeyo kita a la persona del mundo

La manyana koma komo rey, a medio dia komo persona, la noche komo el ultimo prove

La persona yeva mas ke el fierro

Nada no engrandese la persona en ojos de enfrente kuanto una grande desgrasia ke le arriva

Muntanya kon muntanya non se enkontran, persona kon persona se enkontra

A la persona komo la konoses? Segun tu korason

Lo ke la persona aze di negro, il Dio lo dizaze

Persona reglada no se va ver nunka kriada

pues ke ya murieron todas tus personas! (Gaon, Poezias)

aparese una ermoza persona (Gaon, Poezias)

no meresio al trezoro por entrar otra persona. (Gaon, Poezias)

ke por su persona nuestra Ley aviza. (Gaon, Poezias)

Eya es un andjel, enfin es una ija kon la kuala la persona puede bivir venturoza, (Rinio, 1906)

Azanos, grupos, grupos, se vian adjuntados, en un lugar o otro oyendo enkantados de bokas de personas ke kon sus ojos vieron, o de buen manadero las kozas las sintieron. ('Ha-Elion: Shimshon, 2003)

entre nozotros se topan inda personas yenas de ardor por defenderlo (El Triomfo de la Djustisia, Sal 1921)

I en la ora del djuzgo, ke es en yom 'ha-din 'ha-gadol ve-'ha-nora, le preguntan a la presona: (Meam Loez Bereshit)

ni de mitsvot lo taase, ke son las kozas ke deve la presona alesharse de eyas; (Meam Loez Bereshit)

i saviendo ke el kavo de la presona es de apartarse de este mundo (Meam Loez Bereshit)

En la manyana non se lave la presona sus manos kon aguas deskovijadas toda la noche (Shevet musar, Const. 1740)

Disho rabi Elazar: deshala a esta presona: ke koza mueva ay en el ke mozotros no savemos? (Leket 'ha Zo'har, 1855)

Esto es avantaje muy grande por la persona ke pensa bien ke es su mision en este mundo. (M''L Kantar de los Kantares,1899)

ken mata una presona ke esta adientro de otra presona es hayav mita (Meam Loez Shemot I)

Este penserio aze traer a la persona la temor del Kriador i le inspira el miedo de pasar sus komandos del espanto no sea ke se ensanye sovre el i lo apene por sus pekados (Meam Loez Kantar de los kantares, Const. 1899)

i se aparesia una presona entero arrazgado i los kaveyos de su kavesa elguengos ke le tokavan asta los piezes (Shivhe Hayim Vital, Sal. 1892)

vino de Paras una presona [...] ke azia taanit el rov de sus dias, i me disho a mi ke le amostravan a el en el esfuenyo ke la geula de Israel esta dekolgado en mi al yade ke aga tornar a Israel en teshuva (Shivhe Hayim Vital, Sal. 1892)

ama presona ke ay fesfese ke la djente lo djuzgan por yo'hara no pueden azer koza de hasidut sino a la inkuvierta (Pele Yoets I, Viena 1870)

ke no kite la presona de su tino los males ke pueden akonteser; siempre kale pensar ke todos los males kaminan por el mundo i pueden pasar por su kavesa (Pele Yoets I, Viena 1870)

No despresies a ninguna persona ni eches de menos la minima koza (Tefilat Imanuel, 1924)

Se umilde delantre kualunke persona (Tefilat Imanuel, 1924)

Se yama savio kien aprende de kualkier persona (Tefilat Imanuel, 1924)

I malgrado ke en su paseada pre­ferida se enkontravan siempre munshas personas konosidas, (La dam o kamelia)

en viendo pasar una persona, eyos le demandaron por ke les indikara el kamino. (Banyos de sangre, 1912)

esto kudiando sovre la persona del prinsipe tartaro i so su intendente (persona de echo) en mizmo tiempo. (Banyos de sangre, 1912)

Eya era orijiinaria de Fransia tambien i por desgrasia avia sido enganyada por una mala persona (Pavlo i Virdjinia, 1912)

Dos personas se interesavan mas ke otras a la vista de esta toda djente i a la koza ke iva a pasar: (Leonidas el nadador, 1911)

De abasho, ande sienes i sienes de personas estavan asentados en sirkolos familiales, la vista era maraviyoza: (Otniel Hodja, 2002)

Bivi muncho kon personas mayores i las vi muy de serka. Esto no amijuro mi opinion. (El Princhipiko, 2010)

La ley de imigrasion de los Estados Unidos alesensia la entrada libera a todas las personas onestas, pasivas i sanas, ke son kapaches de lavorar i mantenersen eyos propios (La Amerika 1910)

portanto esta situasion es grande pekado, es manzia ke se deshe prolongar, siendo ke las tres kuatro personas ke konchentran en sus manos todos los echos, los poderes, los bienes i los intereses de muestra komunita non konosen mas un termino para sus abuzos (Renasensia Djudia, Sal. 1920)

eyos devian entregarun sierto numero de personas para ke siervan a la armada (El rey i el shastre, Yerushalayim 1925)

una kasha de esparmio sierve a resivir las mas chikas sumas de moneda de kualunke persona ke kere depozitar (La Epoka, Sal. 1875)

kualunke persona ke la veria no puedia dezir ke era imitada (taklid) (El prove doktor, Const. 1904)

yo no de muncha importansa a esto, matar una persona para mi es komo degoyar una gayina (El prove doktor, Const. 1904)

la djovena tenia ainda la figura inosente de una ninya ma su persona era bien formada, sus maneras eran de alta klasa (La Epoka, Sal. 1900)

aviendo sarnudado, kinze a vente personas de las ke estavan a mi derredor se toparon mal del espanto i orden fue de vista dado de no aserkarsen muncho del ''ombre muntanya'' (Guliver, Yerush. 1912)

Sr. Lehman rekordo la mizeria de las personas desplasadas (La Boz de Turkiye, 1947)

Ma koza kurioza, en la persona de Nantes, avia una ambision (grande dezeo) de azer fortuna ke le avia kedado de su madre, (Nantes, Tel Aviv 1952)

Es ke se puede topar persona ke non konose a el selebre Charlie Chaplin ''Sharlo''? (La boz de Yerushalayim, Yerush. 1953-4)

Es ke se puede topar persona ke non konose a el selebre Charlie Chaplin ''Sharlo''? (La boz de Yerushalayim, Yerush. 1953-4)

i nos es imposivle de fraguar un lugar para este djenero de personas, siendo estamos seguro ke no se topan munchas. i alora, kualo azerlo? (El Djugeton, Const. 1908)

por razones ke no puedo espiegar, el Asir de ayer kontiene un artikolo de los mas violentes kontra mi persona (La Epoka, Sal. 1900)

La morgue es un lugar onde depozitan los kadavres de las personas ke son topadas muertas o ke mueren en los espitales I ke no konosen ken son estos kadavres (Matador de kriaturas, Yerush. 1908)

mas ninguna memoria de persona tiene visto una tan grande abondansa (azlaha) de nieve (El Tiempo. Const. 1874)