|
La
mujer djudeo-espanyola en Bosnia Artikulo
de Laura Papo (Bohoreta), eskrito en 1931 Dr.
Avner Perez Ochenta i kuatro anyos ya
pasaron dezde ke Laura Papo "Bohoreta" (Sarayevo1891-1942) eskrivio
su artikulo sovre la mujer djudeo-espanyola en Bosnia. (El artikulo fue
topado eskrito por la propia mano de la autora en dos versiones. Traemos aki
la kopia de la segunda version del artikulo, eskrita en 1931). Tres o kuatro
djenerasiones atras, se avlava ya de un mundo ke estava desparesiendo, ke
estava rempushado por el modernizmo i los aires muevos ke soplavan en Bosnia. Bohoreta eskrive sovre la mujer
djudia i su vida kon muncha empatia saviendo ke se trata de un prezente i de
una forma de vida ke no va tornar mas. Eya deskrive el personaje de la mujer
en la sosiedad sefaradita tradisional en sus aspektos ermozos, ma tambien su
tristeza, su mizeria i su inferioridad en una sosiedad patriarkala maskulina.
A Bohoreta se la puede konsiderar komo una mujer feminista, instruida i
pioniera, ke grasias a su personalidad i sus alkanses konsigio el estatuto de
mujer liberada de los lasos de la sosiedad tradisionala. Komo eskritora i
prinsipalmente komo dramaturga, es la mujer mas sovresaliente de la sosiedad
djudia de Bosnia de antes de la segunda gerra mundial. En sus piesas de
teatro bazadas en el estilo de vida de la sosiedad tradisional, trata de
aserkar la djoven djenerasion para ken el ladino (en el dialekto espesial de
los djudios de Bosnia) ya no es su lengua prinsipala (a lo mas es la lengua
de sus djenitores i de sus avuelos i avuelas), a la lengua, a la tradision i
a la sosiedad djudia i a sus valores. Sovre el estatuto de la mujer djudia
sefaradita en Bosnia, no tiene una opinion kategorika. Era konsiente de los
enormes trokamientos ke se estavan aziendo en la sosiedad i en el estatuto de
la mujer, i no estava segura de ke la mujer liberada de la epoka moderna
bivia una vida mas yena i oroza ke las mujeres de las epokas presedentes. La eksterminasion kaje total del
djudaizmo de Bosnia por los Ustashes kroatos, kolaboradores aktivos de los
alemanes natzis, destruyo i metio un punto final al mundo de esta komunidad
antigua i enraigada de desendientes de ekspulsados de Espanya. Dezde este
punto de vista, la ovra literaria de Bohoreta konstituye un testimonio de
membransa de este mundo i resive ansi una perspektiva trajika i doloroza. El destino de Bohoreta i de su
famiya fue el mizmo ke el de todos los djudios de Bosnia ke fueron eksterminados
por los malazedores. Dr. Eliezeer Papo
publiko un artikulo "La vida i la aktividad literaria de Laura Papo,
"Bohoreta", la primera dramaturga ke eskrivio en
djudeoespanyol", ke figura en "El Prezente" 1, investigasiones
sovre la kultura djudeoespanyola, 2007. Se puede topar el artikulo en: ביבליוגרפיה-פריזינטי - בוכוריטה -איל En su artikulo, Papo eskrive
sovre el fin de Bohoreta i de los demas miembros de su famiya: Los organizadores del
"muevo orden" de los Alemanes i de sus kolaboradores kroatos i
muzulmanes borraron todo lo ke era el mundo de "Bohoreta": Sus ijos
Kuki i Leon fueron arrestados para ser yevados al kampo de konsentrasion
Jasenovac en uno de los primeros asaltos de los Ustashes, ma no yegaron asta
el kampo porke fueron asesinados en el kamino; su ermana Blanki fuyo a Serbia
kon su marido serbo; Riki ke bivia en Belogrado dezde muncho tiempo, se
eskondio en un kazal serbio aizlado del interior del estado, ande los
alemanes no ivan a bushkar djudios; Klari i Yitshak bivian en Zagreb, ma kuando
empesaron los persegimientos, Klari fuyo a Italia kon sus ijos; en kuanto a
Yitshak i su mujer Zdanka, eyos tornaron a Bosnia i se eskondieron en un
kazal aizlado yamado Badvia; Elias ya avia de antes imigrado a Erets Israel.
Es ansi komo de toda esta grande famiya, solamente kedaron en Sarayevo
Bohoreta i Nina. Grasias a su kazamiento kon un marido ariano, la primera ola
de persegimientos de djudios no la toko. En akeyos tiempos, Bohoreta se enfermo. Los
asaltos en las kazas djudias i los embiamientos a los kampos de konsentrasion
sigieron, i Nina, para salvar a su ermana hazina de los Ustashes (los natzis
kroates) i ayudarla en su malo estado de salud, topo un medio de
ospitalizarla en un ospital de monjas katolikas. Las monjas savian ke era
djudia ma el peligro al ke se eksponian por eskonder djudios no las molesto.
"Bohoreta" fue ospitalizada en el departamento de hazinos en final
de vida. Al empesijo, Nina penso ke era a
kavza de los tratamientos de las monjas, ma el estado de la hazina
empeorava kada dia. Nina savia kual fue el destino amargo de Leon i Kuki, ma
segia trayendo buenas notisias de eyos a Bohoreta. El 12 de Djunio de 1942,
en el segundo anyo de la okupasion de los Kroates, murio Laura Papo –
"Bohoreta", de kaza de Levi, a la edad de 53 anyos. Su entierro fue
el ultimo entierro djudio en Sarayevo okupado asta su liberasion en 1945.
Aparte de los enterradores, la unika persona ke asistio al entierro fue su
ermana Nina. En okazion del dia de la Shoa
5775 (2015), prezentamos aki el artikulo de Bohoreta kopiado de su
manuskrito. La kopia fue realizada por mi kolaboradora en el Instituto, Gladys
Pimienta. Konserva la fonetika ke aparese en el manuskrito, ma transkrive el
teksto en la ortografia estandar uzada para eskrivir el ladino en letras
latinas.
Laura Papo (en
medio) con sus ermanas
la
primera pájina
del manuskrito |
