|
La portada enigmatika de la Biblia de Ferrara
(1553) i sus sekretos Dr. Avner Perez Al prinsipio del siekolo 20, el numero La Biblia de Ferrara es
una traduksion en ladino del Tanah. Se publiko por primera vez en Ferrara en el anyo 1553. Sus editores fueron Abraham Usque, i Yom-Tov Atias, desendientes de famiyas de anusim de Espanya i Portugal. La
traduksion esta dedikada en una edision al duke de Ferrara, i en otra
a Dona Gracia Nasi. La Biblia de Ferrara es una revizion de una traduksion ke ya
estava prezente entre los djudios por munchos anyos. La Biblia de Ferrara esta imprimida en letras
gotikas, lo ke indika ke esta edision se imprimio para los anusim ke
fuyeron de Espanya i Portugal i ke ya no estavan akostumbrados a meldar el
espanyol en letras ebreas. Partikularmente
interesante es la portada del livro ke se mostra arriva, i espesialmente la
pintura ke la adorna. Esperariamos enkontrarmos kon una pintura biblika,
dedikada a personajes biblikos, komo Moshe i A'haron, o el rey David, o a una
shena biblika, ma en realidad aparese en la pintura un par de barkos
kevrados.
Parese ke los editores kerian
transmitir a traves de la pintura de la portada un mesaje okulto, ke devian
eskonder de las miradas examinaderas de la Inkizision (djusto ensima de la
pintura meldamos las palavras: "Vista y examinada por el officio dela
inquisicion"!). Bueno, ke es el mesaje sekreto ke ekspresa la pintura? Kero atirar
la atension al kapitulo 48 de los Salmos (ke es el salmo de lunes ke se dize
al final de la orasion de la manyana). Este salmo puede interpretarse en
parte komo una referensia a los ultimos dias kuando todos los reyes de
los paganos estaran yenos de miedo i terror i rekonoseran la predominasion de
Sion sovre eyos. Ke ansi dize el salmo: "... Ek los reyes se adjuntaron; pasaron auna, eyos vieron,
ansi se maraviyaron; se torvaron, se apresuraron, temblor los travo ayi,
dolor, komo de la ke esta de parto, kon el viento solano – kevras las naves
de Tarshish ..." Tarshish, segun una de las identifikasiones (ke probablemente fue
akseptada por los editores de la Biblia de Ferrara) es un gran puerto en
Espanya, o la tierra de Espanya eya mizma. Los "naves de Tarshish"
eran barkos poderozos ke podian navegar grandes distansias asta Tarshish.
Kuando se publiko la Biblia de Ferrara, Espanya era una gran potensia naval,
i la ekspresion "naves de Tarshish" podia interpretarse komo la
armada espanyola. Los editores de la Biblia, miembros de la djenerasion ke
sigio a la ekspulsion de Espanya i la persekusion de la Inkizision, estavan
yenos de ekspektivas por la yegada de la rehmision venidera de los ultimos
días, i al mizmo tiempo el kevrantamiento de la sobrevia espanyola
i la depedrision de su armada. El viento
solano ke rompe las naves de Tarshish, sopla del oriente, kere dizir, de
Sion, ansi la rehmision de Sion implika la kaida de Espanya i su poder. Lo ke no pudieron los editores dezir eksplisitamente por temor a la
Inkizision, lo ekspresaron a traves de la pintura de la portada de la Biblia. |
