|
La djoven R. Navon eskrive dezde Londra un mensaje a su nona en Yerushalayim
al prinsipio del siekolo
pasado Dr. Avner Perez Al prinsipio del siekolo 20, el
numero de mujeres ke savian
meldar i eskrivir pujo muncho en Evropa i en Oriente. Las
eshkolas modernas ke se krearon a finales del siekolo
19 se okupavan tambien de
las ninyas. En los anyos
sesenta del siekolo 19, La djoven R. Navon (no konosemos su primer nombre) bivia
dezde largo tiempo en Londra
(Otro muevo fenomeno de mujeres ke
deshan la kaza de sus
padres i se van a bivir al ekstrajero),
i de ayi eskrive una
letra en djudeo-espanyol
a su vava ke
aparentemente se topa en Yerushalayim (segun indisios ke no detayaremos aki), erev Pesah
1903. Ekspresa la fuerte nostaljia
ke siente (i ke se aze ainda mas fuerte en erev de una fiesta tan familial komo
es Pesah), saluda a kada
miembro de la famiya, los tios
i las tias. Meted tino a la introduksion
i a la konkluzion tradisionales
de la letra kon ekspresiones
de respekto distingido:”Despues de bezarle pies i manos
kon grande respekto…" La eskritura es agradavle, clara i
fasil de desifrar. Se
puede uno demandar si la avuela (la sinyora vava) pudo meldar la letra de
su inyeta o si tuvo menester de ke
alguno se la meldara. Na la foto de la letra kon su transkripsion en letras ebreas kuadradas i en letras
latinas. [צד ראשון] London le 2/4/1903 מי מויי קירידה
אי מוי איסטימאדה סי' ב'אב'ה דיספואיס די ביזארלי פייס אי מאנוס קון גראנדי ריספיקטו פאסו פור אוגורארלי לה פ'ייסטה די פסח ארוגו אל דייו קי אל אנייו קי ב'ייני לו ארימוס טודוס אינג'ונטוס קון מונג'ה אליגריאה
אמן. קירידה סיגורו ייה סי ארה אונה אידיאה
קומו מי טופו איסקאריניוסה אינדימאס קואנדו לאס פ'ייסטאס סי אסירקאן קי קיריאה סיר און פאשאריקו פור ב'ירלוס אי אמאיינאר איל איסקארינייו. קירידה לי רוגו אוגוראר לה פ'ייסטה אה מיס קירידאס טיאס אי מיס קירידוס סי' טייוס אין מיס- מו טיימפו קי ליס ביסו לאס מאנוס קון גראנדי ריספיקטו אי קי מי איסקוסין סי נו ליס איסקריב'ו פארטיקולאר מה אספירו איסקריב'ירליס אין סירקה איל דייו קי מוס אליגרי לוס קוראסוניס
פור [צד שני] פואידיר אסיר איל דוב'יר סירקה מיס קירידוס קי מאלורוזאמינטי מונג'ו לו פינסו די איסקריב'יר מה נו ב'ינו אייאינדה לה אורה פ'אב'וראב'לי. איסטה איס לא ראסון קי מי דיטיני. אספירו קירידה סי' ב'אב'ה קי איסטאן אין בואינאס רילאסייוניס קון מי קירידה מאמה אי מי קירידה אירמאנה ליאה אי איל דייו מוס סאלב'ארה די איסטאס סופ'ריינ- סאס אין פריסטו אמן. קידו ביסאנדו סוס מאנוס קון גראנדי ריספיקטו סו דיב'ואדה אינייטה R. Navon
[primer lado] London le 2/4/1903 Mi muy kerida i muy estimada
si[nyora] vava Despues de bezarle pies i manos kon
grande respekto paso por ogurarle la fiesta
de Pesah. Arogo al
Dio ke al anyo ke viene lo aremos todos endjuntos kon muncha
alegria Amen. Kerida, seguro ya se ara una idea komo me topo eskarensiosa indemas kuando las fiestas se aserkan ke keria ser un pashariko por verlos i amaynar el eskainyo. Kerida, le rogo de ogurar
la fiesta a mis keridas tias i mis keridos
si[nyores] tios en mis- mo
tiempo ke les beso las manos kon
grande respekto i ke me eskusen si
no les eskrivo
partikular. Ma aspero
eskrivirles en serka. El Dio ke mos
alegre los korasones por [segundo
lado] pueder aser el dover
serka, mis keridos. Ke malorozamente muncho lo penso de eskrivir ma no vino ayinda la ora favoravle. Esta es la rason ke me detene. Aspero, kerida si[nyora] vava, ke estan
en buenas relasiones kon mi kerida mama i
mi kerida ermana Lea i el Dio mos salvara de
estas sufrien- sas en presto. Amen. Kedo
besando sus manos kon grande respekto. Su devuada inieta R. Navon
|
